AANDELEBEURSNOTERINGS
Gedurende 2007 het die maatskappy besluit om sy
Amerikaanse deposito-aandele (ADA's) te denoteer van
NASDAQ en sy registrasie van die ADA's by die SEC
(Securities and Exchange Commission) in die VSA te
beëindig. Naspers het sy Amerikaanse Depositobewysprogram
(ADB-program) in 'n Vlak I ADBprogram
omskep. Sy aansoek het ook geslaag om sy
ADA's op die Londense effektebeurs (LSE) te noteer.
Vlak I ADB's word in die VSA op 'n oor-die-toonbank
(ODT) basis verhandel. Internasionale beleggers kan dus
Naspers-sekuriteite deur die Vlak I ADB-ODT, die LSE of
die JSE koop en verkoop.
KORPORATIEWE BESTUUR EN
VOLHOUBAARHEID
Aangesien korporatiewe bestuur en volhoubaarheid
noodsaaklik is vir belanghebbers van die Naspers-groep,
is dit die direksie se strewe om die sake van die groep
met integriteit te bedryf. Die direksie is verbind tot
toepaslike korporatiewe bestuursbeleid en -praktyke in
elke maatskappy in die groep.
Onafhanklike direksies, wat almal hul eie bestuurspraktyke
en subkomitees saamgestel het wat aan die
nodige bestuurs- en regulatoriese vereistes voldoen soos
van toepassing, beheer verskeie van Naspers se filiale.
In die komende boekjaar sal Naspers voortgaan om
terreine te evalueer waar bestuur op 'n korporatiewe vlak en binne filiale versterk kan word. Die implikasies van
die nuwe voorgestelde Maatskappywetsontwerp in
Suid-Afrika, asook die King II-kode oor korporatiewe
bestuur (tans onder hersiening), sal ook ontleed word en
gepaste stappe sal gedoen word.
For the ensuing financial year, Naspers will continue to evaluate areas where governance at a corporate and subsidiary level can be strengthened. The implications of new proposed Companies Bill in South Africa, as well as the King II code on Corporate Governance (currently under review) will also be analysed and appropriate steps taken.
Naspers het vir die eerste keer 'n volhoubaarheidsverslag
opgestel in ooreenstemming met die Global
Reporting Initiative (GRI) - toepassingsvlak C.
Die dokument is beskikbaar op ons webwerf
(www.naspers.com).
Risikobestuur
Die bestuur van risiko speel 'n sentrale rol in die daaglikse
werksaamhede van al ons ondernemings. As 'n
internasionale multimediagroep met sakebedrywighede
in verskeie lande is die groep aan 'n wye verskeidenheid
risiko's blootgestel, waarvan sommige ernstige gevolge kan inhou. Die gediversifiseerde aard van die groep help
egter om blootstelling te versprei.
Naspers se direksie is, in samewerking met die
direksies van beduidende filiaalmaatskappye, daarvoor
verantwoordelik om prosedures vir risikobestuur en
-beheer te bepaal, asook om die doeltreffendheid van die
prosedures te evalueer. Die identifisering van risiko's en
die bestuur daarvan is deel van elke sake-eenheid se
sakeplan.
 |
|
|
| 235 |
|
miljoen rand aan SEB-deelnemers in die
Welkom-aandeleskema uitbetaal |
Risikobestuursfunksies is vir die groot maatskappye in
die groep ingestel, en die proses word van tyd tot tyd
hersien.
Uit 'n verskeidenheid verwante blootstellings blyk
dit dat die volgende groot risiko's tans bestaan:
- globale politieke en markverwikkelinge
- mededinging en tegniese innovasies
- valutaskommelings
- wetgewing en regulasies
- politieke en ekonomiese onstabiliteit
- tegnologiese onderbrekings.
Hoewel hierdie risiko's meestal buite die direksie se
beheer is, kan maatreëls ingestel word om die
uitwerking daarvan te beperk of te voorkom.
Verbintenis tot bemagtiging
Naspers ondersteun die strewe om voorheen
benadeelde gemeenskappe in Suid-Afrika se hoofstroomekonomie
te integreer.
Die Welkom-aandeleskema, wat in 1999 van stapel
gestuur is, het in die 2007-boekjaar gesluit en elke
R1 000 wat belê is, het 'n opbrengs van R31 000
gelewer. Die totale bedrag wat aan SEB-deelnemers
uitbetaal is, het R235 miljoen beloop.
Media24 het met welslae 'n breedgebaseerde swart
ekonomiese bemagtigingskema, Welkom Yizani,
afgesluit. Voortspruitend uit hierdie aandele-aanbod
besit ongeveer 100 000 swart persone en groepe nou
indirek 15% van Media24 Beperk.
MultiChoice Suid-Afrika het twee suksesvolle
bemagtigingstransaksies, Phuthuma Nathi en
Phuthuma Nathi 2, afgehandel. Hierdie transaksies is saamgestel om werklik breed gebaseer te wees. Sowat
120 000 swart persone en groepe besit nou indirek
altesaam 20% van MultiChoice Suid-Afrika Beherend
(Eiendoms) Beperk.
'n Volledige oorsig van korporatiewe bestuur
(risikobestuur ingesluit) verskyn hier van die jaarverslag.
DIREKTEURE
Kragtens die maatskappy se statute tree een derde van
die nie-uitvoerende direkteure jaarliks uit en heraanstelling
geskied nie outomaties nie. Prof G J Gerwel,
mnre J J M van Zyl en B J van der Ross, wat by die
algemene jaarvergadering volgens rotasie uittree, is
verkiesbaar en stel hulle vir herverkiesing beskikbaar.
Mnr J P Bekker is met ingang van 1 April 2008 weer
as uitvoerende hoof vir 'n vaste termyn van vyf jaar
aangestel, ná sy onbetaalde sabbatsjaar van een
finansiële jaar. Aandeelhouers sal gevra word om die
heraanstelling van die direkteure wat volgens rotasie
uittree, asook die goedkeuring van mnr J P Bekker se
aanstelling as besturende direkteur, te oorweeg by die komende algemene jaarvergadering, waarvan die
kennisgewing in hierdie jaarverslag verskyn. Die verkorte
curricula vitae van al die direkteure verskyn van die jaarverslag.
MENSE
Snelbewegende markte vereis dat ons buigsaam moet
wees en vinnig by verandering aanpas. Die groep het die
regte vaardighede nodig om die uitdagings die hoof te
bied in al die markte waarin ons bedrywig is. Ons is trots
op die bydrae van ons mense in soveel lande. Oor die
afgelope jaar het hulle ondernemingsgees getoon deur
die meeste van die doelstellings te bereik wat vir ons
ondernemings gestel is. Ons waardeer hul toewyding.
Ten slotte bedank ek graag my mededireksielede vir hul
leiding en ondersteuning gedurende 'n bedrywige jaar.
Ton Vosloo
Voorsitter |
