Inleiding

Aangesien korporatiewe bestuur noodsaaklik is vir die belanghebbendes van die Media24 Beherend-groep, is dit die direksie se strewe om die sake van die groep met integriteit te bedryf. Die direksie is verbind tot toepaslike korporatiewe bestuursbeleid en -praktyke in elke maatskappy in die groep.

Media24 Beherend is ’n filiaal van Naspers Beperk (’n maatskappy wat op die JSE Beperk en die Londense aandelebeurs genoteer is), en poog dus om, waar moontlik, te voldoen aan onder meer die riglyne wat vervat is in die King-verslag oor korporatiewe bestuur vir Suid-Afrika van 2002 (King II).

Media24 Beherend het ’n onafhanklike direksie, met sy eie gevestigde bestuurspraktyke en subkomitees wat in die geheel aan toepaslike bestuurs- en regulatoriese vereistes voldoen.

Die direksie se oudit- en risikobestuurskomitee en mensehulpbronnekomitee speel ’n sleutelrol om goeie korporatiewe bestuur te verseker.

 Verbeterings gedurende die afgelope jaar en planne vir die komende jaar

Die beplanning van en verslagdoening oor die groep se volhoubaarheid op alle tersaaklike gebiede, maar met ’n besondere fokus op korporatiewe maatskaplike beleggings, is hersien.

Hoewel die direksie van mening is dat die maatskappy se nakoming van die toepaslike bestuursvereistes voldoende is, besef hy dat praktyke en prosedures altyd verbeter kan word en derhalwe evalueer hy die vordering op ’n jaarlikse grondslag.

In die komende boekjaar sal Media24 Beherend voortgaan om gebiede te evalueer waar korporatiewe bestuur versterk kan word. Die implikasies van die nuwe voorgestelde Maatskappywetsontwerp in Suid-Afrika, asook die King III-kode oor korporatiewe bestuur (tans hersien), sal ook ontleed word en gepaste stappe sal gedoen word.

 Die direksie

Samestelling
Die besonderhede van die direkteure op 31 Maart 2008 word op hier van hierdie jaarverslag uiteengesit.

Media24 Beherend het ’n unitêre direksiestruktuur wat ’n toesighoudende asook ’n beherende funksie vervul. Die direksie het ’n reglement wat ’n duidelike verdeling van verantwoordelikhede aandui. Die meeste direksielede is nie-uitvoerende direkteure wat onafhanklik van bestuur is, om te verseker dat niemand onbeperkte besluitnemingsmag en -gesag het nie. Dit verseker dat aandeelhouersbelange beskerm word. Hierbenewens is die rolle van die voorsitter en uitvoerende hoof geskei om ’n duidelik omskrewe verdeling van verantwoordelikhede te verseker.

Die voorsitter
Die voorsitter is ’n onafhanklike, nie-uitvoerende direkteur. Hy gee leiding aan die direksie in die geheel en verseker dat die direksie doeltreffend en gefokus is en as ’n eenheid werk. Hy tree as fasiliteerder by direksievergaderings op om ’n vloei van menings te verseker en poog om, in belang van goeie bestuur, besprekings tot optimale resultate te lei. Hy verteenwoordig die direksie in eksterne kommunikasie, in oorleg met die uitvoerende hoof en die finansiële hoof.

Die uitvoerende hoof
Die uitvoerende hoof rapporteer aan die direksie en is verantwoordelik vir die daaglikse sake van die groep en die uitvoer van beleid en strategieë wat deur die direksie goedgekeur is. Uitvoerende hoofde van die onderskeie ondernemings help hom met hierdie taak. Gesag wat deur die direksie aan die bestuur toegesê is, word deur die uitvoerende hoof in ooreenstemming met goedgekeurde gesagsvlakke gedelegeer.

Aanstellings in die direksie
Die direksie het ’n beleid aanvaar oor prosedures vir die aanstelling en oriëntering van direkteure. Die nominasiekomitee beoordeel van tyd tot tyd die vaardighede van die nie-uitvoerende direkteure in die direksie en besluit of daardie vaardighede aan die maatskappy se behoeftes voldoen. Jaarlikse selfbeoordelings deur die direksie en sy subkomitees help ook hiermee. Direkteure word uitgenooi om te help met die identifisering en nominasie van potensiële kandidate. Die lede van die nominasiekomitee, wat almal onafhanklik is, stel geskikte kandidate vir oorweging deur die direksie voor. ’n “Geskikte en gepaste” evaluering van elke geïdentifiseerde kandidaat word gedoen.

Uittrede en herkiesing van direkteure
Geen direkteur is tans aan uittrede en herkiesing deur aandeelhouers by ’n algemene jaarvergadering onderworpe nie. Ton Vosloo, Ruda Landman, Russel Botman en Wilmot James stel hulself egter op ’n vrywillige basis beskikbaar vir uittrede, maar hulle is as direkteure herkiesbaar.

Oriëntering en ontwikkeling
Daar is ’n induksieprogram vir nuwe lede van die direksie en van sleutelkomitees, wat spesifiek aangepas word by die behoeftes van elke individu. Die program behels bedryfs- en maatskappy-spesifieke oriëntering, insluitend maatskappybesoeke en vergaderings met senior bestuur soos toepaslik, om ’n begrip van bedrywighede te verseker. Die maatskappysekretaris help die voorsitter met die induksie en oriëntering van direkteure, en reël ook spesifieke opleiding, indien nodig.

Die maatskappy is verbind tot die voortgesette ontwikkeling van direkteure om hulle te help om hul kundigheid uit te brei en ’n begrip te kry van die ondernemings en die markte waarin die maatskappy werksaam is.

Botsings van belange
Media24 Beherend het formele prosedures aanvaar wat handel oor die bestuur van potensiële botsings van belange om te verseker dat kandidaatdirekteure, asook bestaande direkteure, geen botsings van belange tussen hul verpligtinge teenoor die maatskappy en hul private belange het nie. Enige belang in kontrakte met die maatskappy moet amptelik openbaar gemaak en gedokumenteer word. Direkteure moet ook by ’n formele beleid hou ten opsigte van die verhandeling van sekuriteite van Media24 Beherend se beheermaatskappy, Naspers.