Koos Bekker het die span gelei wat M-Net in 1985 gestig het en was daarna tot 1997 uitvoerende hoof van die MIH-groep. Hy was ook ’n stigtersdirekteur van MTN. Hy is ’n direkteur van Media24, MIH B.V., MIH Mauritius, MIH Beherend, MultiChoice Suid-Afrika Beherend en ander maatskappye binne die breër groep. Hy dien ook in die plaaslike reëlingskomitee vir die 2010 Fifa Wêreldbeker-sokkertoernooi, en die Raad van die Universiteit Stellenbosch. Hy is sedert 1997 uitvoerende hoof van Naspers.

  Jakes Gerwel het in 1999 as ’n direkteur by die Naspers-groep aangesluit. Hy was voorheen direkteur-generaal in die kantoor van oudpresident Nelson Mandela, sekretaris van die kabinet en rektor van die Universiteit van Wes-Kaapland. Prof Gerwel is die kanselier van Rhodes-universiteit en voorsitter van ’n aantal organisasies, waaronder Media24, Brimstone Investment Corporation, die Suid-Afrikaanse lugdiens, die Instituut vir Geregtigheid en Versoening, die Nelson Mandela-stigting, die Mandela Rhodes-stigting en Welkom Yizani. Hy is ’n direkteur van Distell en Old Mutual, en dien in die dagbestuur en mensehulpbronne- en nominasiekomitees van Media24 en Naspers. Sy kwalifikasies sluit in BA, BAHons, DLitt et Phil, LicGermPhil en DHumSc (hc). Die Nelson Mandela Metropolitaanse Universiteit het in 2008 ’n eredoktorsgraad in die lettere aan hom toegeken. Hy is in 2007 as ’n erelid van die SA Akademie vir Wetenskap en Kuns aangewys.

  Hein Brand het ’n BRekHons, BComHons en LLB verwerf en is ’n geoktrooieerde rekenmeester. Hy het in 1998 as finansiële hoof by Naspers aangesluit. Hy is ’n voormalige finansiële direkteur van Bonnita (Eiendoms) Beperk. Vanaf 2000 was hy die finansiële Vanaf 2000 was hy die finansiële direkteur van Media24. Hy is in 2002 as uitvoerende hoof van Via Afrika aangestel en in 2005 as besturende direkteur van Media24. Sy direkteurskappe sluit onder meer in MIH Drukmedia Beherend, Paarl Media Beherend, Via Afrika en Abril S.A.. Hein het op 30 Junie 2008 as ’n direkteur van Media24 bedank en sal sy loopbaan voortsit by MIH, ’n sustermaatskappy in die Naspers-groep.

  Russel Botman het die grade BA en DTh verwerf. Hy is sedert 2004 president van die Suid-Afrikaanse Raad van Kerke en het in die ministeriële taakgroep gedien wat die minister van onderwys van raad bedien het oor sake aangaande godsdiens en onderwys. Hy is ’n direkteur van Media24, ’n voormalige direkteur van Nasionale Boekuitgewers en voorsitter van die Absa Klein Karoo Nasionale Kunstefees. Voor hy hom in 2000 by die Universiteit Stellenbosch aangesluit het as professor in missiologie en praktiese teologie, was hy dekaan van die fakulteit godsdiens en teologie aan die Universiteit van Wes-Kaapland. Hy is in 2007 as rektor en visekanselier van die Universiteit Stellenbosch aangestel.

  Salie de Swardt het die kwalifikasies BAHons en BEcon aan die Universiteit Stellenbosch verwerf en die Nieman Fellowship aan Harvard-universiteit. Gedurende sy loopbaan by die Naspers-groep was hy onder meer finansiële verslaggewer by Die Burger, finansiële redakteur en redakteur van Beeld, stigter en redakteur van Finansies & Tegniek (nou Finweek), uitvoerende hoof van Media24 Tydskrifte en besturende direkteur van Media24 vanaf 2000 tot sy uittrede in 2005. Hy is ’n direkteur van Media24, Paarl Media Beherend, Aardklop-kunstefees en die ATKV.

  Francois Groepe het die grade BComHons, MBA, LLB en ’n nagraadse regsdiploma in belasting verwerf en is ’n geoktrooieerde bestuursrekenmeester. Hy is ’n direkteur van Media24 en uitvoerende hoof van die groep se koerantuitgewery. Hy was voorheen ’n finansiële direkteur van Media24. Hy is ’n direkteur van die Suid-Afrikaanse Reserwebank, Absa Klein Karoo Nasionale Kunstefees, ’n direkteur van Paarl Media Beherend, ’n direkteur van Media24 Afrika, Media24 Nigeria en ander filiaalmaatskappye in die groep. Francois is met ingang 1 Julie 2008 aangestel as uitvoerende hoof en besturende direkteur van Media24.

  Wilmot James het ’n PhD in sosiologie en Afrika-geskiedenis. Hy is in 2004 as ’n direkteur van Media24 aangestel. Hy was voorheen ’n direkteur van die Raad vir Geesteswetenskaplike Navorsing (RGN), dekaan van geesteswetenskappe aan die Universiteit van Kaapstad, direkteur van die Instituut vir Demokrasie in Suid-Afrika (Idasa) en professor in sosiologie aan die Universiteit van Kaapstad. Hy is tans uitvoerende hoof van die Africa Genome Education Institute en ereprofessor in menslike genetika aan die Universiteit van Kaapstad. Hy is ook ’n direkteur van Fynbos (Eiendoms) Beperk, The Grape Company, Sanlam en Sanlam Lewensversekering. Hy is voorsitter van die Kaapse Filharmoniese Orkes en die Fynbos-stigting.